الشوارع حواديت



الشوارع حواديت
حواديه الحب فيها
وحودايه...عفاريت
اسمعي يا حلوة لما اضحكك

الشارع دا كنا ساكنين فيه زمان
كل يوم يضيق زيادة عن ما كان
اصبح الآن بعد ما كبرنا عليه
زي بطن الأم مالناش فيه مكان

الشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك

بيانولا




انا دبت وجزمتي نعلها داب
من كتر التدوير ع الاحباب
يا سلاملم لو اعتر ف حبيب
دا انا ارقص من كتر الاعجاب
واتنطط واتعفرت واترقص 
كدهوه كدهوه كدهوه

انا قلبي مزيكا بمفاتيح
من لمسة يغنيلك تفاريح
مع اني ما فطرتش وجعان
ومعذب ومتيم وجريح
باتنطط واتعفرت واترقص
كدهوه كدهوه كدهوه

بيانولا وألابندا وحركات
اطلعي بقى يا نصاص يا فرنكات
انا عازمك يا حبيبي لما الاقيك 
على فسحة في جميع الطرقات
نتنطط نتعفرت نترقص كدهوه
كدهوه كدهوه كدهوه

كلمات: صلاح  جاهين
ألحان: سيد مكاوي

الشاي باللبن



أربـع إيـديـن عـلى الفـطار
أربـع شـفايف يشربوا الشاى باللبن
ويـبوسوا بعض ويحضنوا نور النهار
بـين صدرها وصدره وبين البسمتين
ويحـضنـوا الحب اللى جمعهم سـوا
على الفطـار
ويحـضنوا الشمس اللى بتهز السـتار
وتـخش من بـين الخيوط وبعضـها
مع الهــوا
للأودة تـرسم نفسـها عـلى أرضها
عـلى البساط اللى اشتروه مع الجهاز
على الغرام اللى اشتروه من غير تمن
وعلى القـزاز
ويـشربـوا الشــاى باللــبــن
فى فنجالـين
عــلى الفـطار أربــع إيـديـن
ودبلتـــين
بيـصـحُّوا قـلبى كل ليلة فى المنام
وبـيكتـبولى بـلـون منَـور فزدقى
على الهـوا الاسود وع الجفن اللى نام
كلمة "سلام"

ما اقدرش أنسى البشر



موجود على الأرض دم كتير وله أصحاب

ماشيين على الأرض لسه مانتهوش لتراب
قاعدين على البرش لسه من ورا الأبواب
لاهثين ورا القرش لسه وبيطولوه بعذاب
عايشين على الشمس والطين هما والأعشاب
عاملين لترس المكينة سيور من الأعصاب
حارقين فى فرن القمينة عضمهم أخشاب
رايحين وجايين غلابا مظلومين أغراب