الدرس انتهى





الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..


ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

هناك 6 تعليقات:

Human يقول...

وإحنا نايمين على ودانا

منة الله يقول...

الاخ الفاضل صاحب المدونة
مبروك
مدونتك كتب عنها اليوم بجريدة الدستور و هذا رابط صورة من الصفحة
http://img515.imageshack.us/img515/7489/jaheenlv9.jpg

داليا عز يقول...


لو الخبر بتاع إياف دا مظبوط .. يبقى حاجة من اتنين

يإما النهاية قربت

يإما البداية لسه مانتهتش أساسا

ربنا يوفقك
بنت النيل

coca يقول...

مدونه جميله ولنها خلتني اعيط
كلام جاهين بيجي علي الجرح ويحسسك المر

حبة حاجات (ايمان) يقول...

مايقلش الكلام دا غير جاهين

مدنه جميله احييك عليها

تسمحيلى اضفها فى مدونتى

تحياتى

Yahia يقول...

أكيد بيجمعوا عشان يلاقوا مصرهم المحتوم.

وصلاح جاهين احسن شاعر حاسس بجرحنا

تحياتي